Айрим депутатлар Садир Жапаровнинг бош вазир лавозимига сайланишини ноқонуний деб айтишди. Бунинг асосий сабаби мажлисда кворумнинг етишмаслигидир.
Олий Кенгашнинг регламентига биноан сессияда камида 61 нафар депутат қатнашиши шарт. Бунга ишончнома қўшилади. Бироқ, бир фракциянинг депутати бошқа фракция аъзосига ишончнома бера олмайди.
Куни кеча Давлат қароргоҳидаги бўлиб ўтган йиғилиш бошида Спикер Миқтибек Абдилдаев залда 51 депутат борлигини, улардан 10 нафари ишончнома юборганини эълон қилди. Ўша пайтда парламент аъзолари яна бир-иккитаси йўлда эканлигини айтишган эди.
Аммо депутат Дастан Бекешев кворум йиғилмаганлигини айтмоқда.
«Кворум бўлмаган. Бундан ташқари, бошқа қонунбузарликлар ҳам аниқланди. Овоз бериш натижалари эълон қилинмади, депутатлар бошқа фракциялардаги ҳамкасбларининг ишонч ёрлиқларидан фойдаландилар. Бу бўйича судда баҳслашишимиз мумкин», – деди Дастан Бекешев.
Шунингдек вице-спикер Аида Қасималиева ўзининг Facebookдаги саҳифасида учрашувни ноқонуний деб ҳисоблаганини ва охиригача қатнашмаганлигини ёзди.
«Мен ўз норозилигимни билдириш ва мажлисни легитимсизлаштириш учун чиқиб кетдим. Урмат Самаев (депутат – таҳр.) ва унинг номини айтишдан қўрқадиган хўжайини мен сизлардан қўрқмайман. Ҳали ҳам жамоат транспортида юраман ва ёлғиз юраман. Агар қизим, менинг оиламга агар бирор нарса бўлса, бу ерда нима ёзилганини эсланглар «, – деб ёзган Қасималиева.
Депутат Қанибек Иманалиев фақат Садир Жапаровга қарши туриш учун эмас, балки парламентнинг қонуний йўл билан кетишини талаб қилаётганини маълум қилди.
«Ҳозир ҳукуматнинг қонунийлиги ҳақида баҳс бўлмоқда. Биз барча томонларнинг манфаатларини инобатга олишимиз керак. Эртага Атамбаевнинг тарафдорлари чиқиб, шундай дейишлари мумкин. Шунинг учун президент депутатларнинг хавфсизлигини таъминлаши керак. Кеча атиги 41 депутат қатнашди, иккитаси (Калдарбек Баймуратов, Аида Қасималиева) кетишди. Фақат 39 таси қолди ”, – деди Иманалиев.
Вазирни сайловлашда қатнашган парламент аъзоси Бақтибек Турусбеков депутат сессиядан чиқиб кетган тақдирда ҳам, у рўйхатдан ўтган бўлиб қолишини айтди.
«Ҳуқуқий нуқтаи назардан нуқсонни топиш мумкин, аммо биз депутатлар биринчи навбатда халқ вакиллармиз, шунинг учун уларни тинглаймиз. Агар бошқа парламент аъзолари эътироз билдирса, улар йиғилишга келиб ўз фикрларини билдиришлари мумкин. Охир оқибат бу бизнинг ишимиз. «Бироқ, депутатлар аллақачон ўз ҳамкасбига ишончнома беришган. Бундай ҳолда, халқ ва давлат манфаатларини ҳисобга олиш керак. Бунинг устига ҳозирги вазият кескин», – деди депутат.
Евгения Строкованинг таъкидлашича, у давлат қароргоҳига энг охирги бўлиб келган.
Мен ҳали ҳам касалман, лекин ишимни ташлай олмайман. Вазиятни ичкаридан кузатиб, ўз фикримни билдирмоқчиман. Келган депутатларни санаб чиқмадим, аниқ сонини айта олмайман. Агар сиз парламент залидан ўтганингизда қанча одам келганини кўрсангиз, ўша залда кўплаб журналистлар ва бошқа одамлар бор эди. Сўнгра овоз бериш қоидаларига риоя қилиш керак, бир киши барчанинг ишонч ёрлиқларини тўплай олмайди. Биз бундан кейин суриштириб, бир фикрга келамиз. Бизнинг асосий вазифамиз мамлакатни барқарорлаштириш эди «, – деди Строкова.
Қонунга кўра …
Олий Кенгашнинг Регламентининг 82-моддасига биноан, агар кворум тўпланмаса, спикер 15 дақиқалик танаффус эълон қилади. Агар ушбу оралиқда тўлдирилмаса, мажлис бекор деб ҳисобланади.
Конституциянинг 84-моддасига биноан, парламент бош вазирликка номзодини тасдиқлаганидан кейин президент уч кун ичида бош вазир ва ҳукумат аъзоларини тайинлаш тўғрисидаги фармонни имзолайди. Агар ушбу муддат ичида фармон чиқмаса, бунга қарамай ҳукумат аъзолари тайинланган бўлиб ҳисобланади.
